CEBU, Philippines – Gisugyot ni House Deputy Speaker Mikee Romero nga lima ka langyaw'ng mga basketbolista ang himuong naturalized players nga magpulipuli og duwa sa Gilas Pilipinas sa mga internasyonal nga kompetisyon nga salmotan niini.
Nangusog si Romero nga kinahanglan na mangita og hulip alang ni Andray Blatche kay hinay ug dili na kaayo epektibo basi sa iyang performance sa miaging World Cup. Mi-average lang siya og 18 puntos sa lima ka duwa.
Si Romero, ang party list representative sa 1-Pacman, gusto nga dili moubos sa lima ang naturalized players sa Gilas nga maoy kuhiton ilabi na sa mga dagkong torneyo sama sa World Cup, World Cup qualifiers, Asian Games, FIBA Asia Championships ug Southeast Asian Games.
"For me kailangan mag-recruit tayo ng at least lima," matud pa ni Romero sa Spin.ph.
Si Romero mao ang mipasar sa balaudnon sa kongreso sa paghimo nga naturalized player ni Barangay Ginebra import Justin Brownlee.
Nakita niya nga haum si Brownlee sa Gilas, apan kinahanglan pa nga mangita og mas dagko ug tag-as nga player ang Pilipinas.
Gawas ni Brownlee, posibleng himuong naturalized player sa Gilas mao sila si ex-NBA cager ug kanhi TNT KaTropa import Terrence Jones ug champion import sa San Miguel Beermen nga si Chris McCollough.