Biasong sud sa Talisay Mayor's Cup quarterfinals

CEBU, Philippines — Si Christopher Obeso maoy nangu sa lima ka players nga naka-double figures uban ang 20 puntos sa dihang gibuntog saBiasong ang Tapul, 109-101 aron pagpabiling wa'y pilde sa seniors division sa 2019 Talisay City Mayor's Cup Inter-Barangay Tournament didto sa Talisay City Sports Complex.

Si Joel Bensig midugang og 13 puntos, si June Labrica miiskor og 12, samtang sila si Joeji Bas ug Carlo Hernani nagkumboya'g 21 puntos alang sa Biasong nga mi-abante sa crossover quarterfinals isip top seed sa Bracket C bitbit ang 3-0 nga baraha.

Human sa init nga sinugdanan, 31-19, misamot pa og kabangis ang Biasong aron pag-inat sa ilang labaw ngadto na sa 19 puntos sa halftime. Wala na makabawi pa sukad niadto ang Tapul.

Sa laing aksiyon, ang Tangke milampurnas sa Jaclupan, 108-82 aron pagpahayag sa ilang tsansa nga motikang sa quarterfinals uban ang 3-1 record sa Bracket B.

Si Paul Torrecampo maoy nangu sa Tangke uban ang 21 puntos, samtang sila si Belmito Daan, Daryhl Fernandez ug Enovine Amagos nagkumbinar og 45 puntos.

Sa juniors division, sila si Allen Tabay ug Jeff Diaz mitali og 13 puntos matag usa sa dihang gilubong sa Dumlog ang Linao, 93-75  aron tablahon ang ilang rekord ngadto sa 2-2, samtang sila si Ramel Eleguin ug John Lasola parehong mipabuto og 30 puntos alang sa Maghaway nga nanamilit uban ang 104-79 nga demolisyon sa Poblacion nga nakasanta sa upat ka sagunson nilang pilde