Bogut nasagmuyo sa officiating

CEBU, Philippines — Gipahungaw ni Australian  center  Andrew Bogut ang iyang kasuko ngadto sa referees sa FIBA nga sa iyang tan-aw mipabor sa Spain  hinungdan nga misangko  ang ilang duwa ngadto sa double overtime sa semifinals sa FIBA World Cup niadtong Biyernes sa gabii didto sa Beijing, China.

Ang Australia  napilde sa iskor nga 88-95 nga nakapasuko og maayo sa NBA veteran nga si Bogut. Misyagit si Bogut paingon sa locker room ug iyang gibalikas ang FIBA ug mga officials niini. "Cheating ass FIBA. 

FIBA are a disgrace," syagit pa ni Bogut.

Ang Australia maoy naglabaw sa nag-unang tulo ka kuwarter sa sikit kaayo nga duwa. Apan  ang Spain nakahimo paggukod ang nahatad pa ang duwa ngadto sa double overtime.   

Gireklamo ni Bogut ang mga krusyal nga plays  ug nagtuo sila nga nakahimo og foul ang magduduwa sa Spain.

Dako untang kasaysayan  ang mapatik sa Australia kon nidaog pa sila tungod kay kini ang labing una nilang finals appearance sa  World Cup. Labing layo nga naabtan sa Australia ang semifinals. 

Mosuway pa hinuon sila pagsakmit sa bronze medal  sa ilang sangka batok sa France nga napilde sab ngadto sa Argentina sa iskor nga 80-66.