CEBU, Philippines – Gikataw-an ni pound-for-pound king Vasyl Lomachenko ang pangutana kon sundon ba niya si Pinoy legend Manny Pacquiao nga miaway lang gihapon bisan og nag-edad na kini og 40-anyos.
Si Lomachenko, ang giisip karon nga labing maayong boksidor sa kalibotan, mosugal sa iyang WBA ug WBO lightweight belts batok ni Luke Campbell karong Domingo.
Ang 31-anyos nga si Lomachenko nagkanayon nga plano niya nga moundang sa pamuksing sa dili pa siya mag-40-anyos kay gusto niya nga moretiro nga himsog.
Si Lomachenko mibilib sa nakab-ot ni Pacquiao nga nahimong labing edaran nga world champion sa kasaysayan human midaog batok ni Keith Thurman niadtong Hulyo 21 atol sa ilang WBA welterweight title fight.
Apan gusto niya nga makaangkon og katagbawan sa iyang karera ug mitug-an siya nga dili sayon ang padayong pagsaka sa ring samtang nagkataas ang edad.