CEBU, Philippines – Midako ang kahigayonan ni Cebuano point guard Eloy Poligrates nga makabalik sa PBA human siya mikulit og rekord sa PBA D-League.
Si Poligrates nimugna og kasikas PBA D-League dihang mirehistro kini og 67 puntos atol sa kadaogan sa Marinerong Pilipino nga milubong sa iWalk sa iskor nga 141-97 sa miaging gabii.
Kini ang labing dakong scoring output nga nabuhat sa usa ka player sa D-League sa kasaysayan. Mismo ang mga D-League coaches miangkon nga lisud kini tupngan.
Nabuak ni Poligrates ang karaang rekord ni James Martinez nga 58 puntos nga natala niadtong tuig 2016.
"First time ko nakagawa ng ganito sa big league kaya pasalamat lang talaga ako kay coach Yong na nagtiwala siya sa akin," matud pa ni Poligrates sa Spin.ph.
Ang coach ni Poligrates nga si Yong Garcia miingon nga dili imposible nga makaduwa si Poligrates sa umaabot PBA Governors' Cup sa tungod kay miani na og interes gikan sa teams ang iyang guwardiya.