Reed, Steffen pabiling kampiyon

CEBU, Philippines — Mibalik ang paghari nilang Tim Reed sa Australia ug Caroline Steffen sa Switzerland isip mga kampiyon human gidominar ang tagsa-tagsa nila ka mga kategoriya sa 2nd Regent Aguila Ironman 70.3 Asia-Pacific Championships kagahapong adlawa didto sa Shangri-La’s Mactan Resort & Spa sa dakbayan sa Lapu-Lapu.

Dul-an sa duha ka bulan sukad sila nanghawod sa Ironman 70.3 Subic, sila si Reed ug Steffen misidlak na sab ning makutas nga lumbas nga naglangkob og 1.9K swim, 90K bike, ug 21K run.

Managlahi hinoon nga dalan ang ilang giagian sa wala pa hingpit matungas ang bukid sa kalampusan.

Si Reed nakasukagakod sa malisud nga hagit ni Mike Philips sa New Zealand aron langkaton ang men's pro title. Iya gihuman ang lumba sud sa upat ka oras, usa ka minuto ug 22 segundos.

Sikit kaayong nagsunod kaniya si Philips nga mipatak og oras nga 4:02:09. si Tim Van Berkel sa Australia maoy mipahiluna sa ikatulong dapit sa oras nga 4:03:12.

“The crowd support is one big thing and it took me a long time to get my fourth win so this is very special,” matud pa ni Reed nga milangkat sa ikaupat niyang titulo sukad siya nakagrandslam niadtong tuig 2015-2017.

Sa women's pro, yanong gidominar ni Steffen ang lumba gikan sa sinugdanan hangtud sa katapusan.

Nakakuha og inspirasyon sa 18 ka bulan pa niyang anak nga si Xander, si Steffen mibulhot sa finish line sud sa labing paspas nga oras nga 4:24:10. Labaw siya og 12 minutos sa beteranong Australyana nga si Dimity Lee Duke nga maoy miangkon sa ikaduhang puwesto.

Mao kadto ang ikaunom nga korona ni Steffen sud sa walo ka Ironman 70.3 dinhi sa Sugbu.

“I just love the place. If you feel happy with the place you race well and the six wins speak for itself,” dason pa ni Steffen.

Sa Asian Elite category, sila si Nikko Huelgas (4:24:56) ug Alexandra Ganzon (5:43:51) maoy nanghawod.