Gilas mihirit daog batok Ivory Coast
CEBU, Philippines — Gitapos sa Gilas Pilipinas ang usa ka semana nila nga training camp didto sa Spain pinaagi sa usa ka daog batok sa Ivory Coast, 73-63, sa usa four-team tuneup tournament.
Ang Gilas daling nakabawi human madisgrasya sa Congo niadtong Sabado. Ang Gilas nga wala kakuha og tsansa nga makaduwa sa powerhouse Spain mitapos sa torneyo nga third placer sa rekord nga 3-1. Ang Spain maoy mikampiyon sa maong pocket tournament, samtang ang Congo ang second.
Ang NorthPort Batang Pier rookie nga si Robert Bolick subling mipakita nga angayan siya og luna sa national team nga moduwa sa World Cup karong Agosto 31 didto sa China, human sa laing high-scoring game.
Si Bolick nangulo sa opensa sa mga Pinoy sa iyang 19 puntos, samtang si naturalized center Andray Blatche mirehistro og double-double nga 18 puntos ug 18 ka rebounds.
"The short tournament enabled us to gain confidence as we enter the last two weeks of preparation for the FIBA World Cup,"matud pa ni coach Yeng Guiao.
Ang Gilas motapos sa ilang preparasyon sa World Cup dinhi sa nasud diin moduwa sila og tuneup games batok sa Australian commercial league team.
Ang national team nag-atubang og lisud nga tahas sa World Cup diin una nilang sangkaon ang lig-on nga Italy sundan sa Angola ug katapusan mao ang powerhouse nga Serbia sa preliminary rounds.
- Latest
