CEBU, Philippines – Pabiling positibo si kanhi All-Star Carmelo Anthony nga adunay koponan nga mokuha kaniya sa sunod season sa NBA.
Ang trainer ni Anthony nga si Chris Brickley nagkanayon nga wala mohunong sa ensayo ug pakondisyon ang Olympic gold medalist sa pamasin nga adunay koponan nga motanyag kaniya og kontrata.
"I believe Melo is 100 percent NBA ready and I believe that he is better than 70 percent of the players in the league right now," matud pa ni Brickley sa NBA.com.
Unang gidungog niadtong miaging bulan ang posibleng pagkuha sa Los Angeles Lakers ni Anthony tungod kay aduna pa kini usa ka luna sa line-up, apan wala mipakita og interes ang kadagkoan sa koponan. Padayon pa usab nga nagpaabot ang agents ni Anthony sa New York Knicks kon mopakita ba kini og interes alang sa pagkuha sa 35-anyos nga scorer.
Ang kanhi scoring champion katapusang miduwa niadtong Nobiyembre sa miaging tuig uban sa Houston Rockets ug gikan didto wala na siya makabalik pa sa liga.