CEBU, Philippines – Human mapakyas duha ka higayon, si 'King' Arthur Villanueva mosuway na sab og kab-ot sa iyang damgo sa dihang iyang sangkaon ang wa'y pildeng French champion nga si Nordine Ooubali alang sa World Boxing Council bantamweight belt karong adlawa didto sa Bary's Arena sa Astana, Kazakhstan.
Sa unang higayon nga miaway siya alang sa world title, ang 30-anyos nga si Villanueva napilde pinaagi sa technical decision batok ni Puerto Rican McJoe Arroyo sa ilang International Boxing Federation super flyweight championship bout niadtong Hulyo 18, 2015 didto sa Don Haskins Center sa El Paso, Texas.
Duha ka tuig ang milabay, ang garbo sa Bago City, Negros Occidental miyukbo ngadto ni South African Zolani Tete pinaagi sa unanimous decision sa ilang bugno alang sa World Boxing Organization bantamweight crown niadtong Abril 22, 2017 didto sa Leicester Arena sa Leicester, United Kingdom.
Karon nga nahatagan og bulawanong oportunidad sa ikatulong higayon, si Villanueva ug ang iyang kampo nanghinaut nga ila nang makuha ang ilang gihandum ning higayona.
Si Villanueva nagkupot og 32-3-1 record uban ang 18KOs, samtang si Ooubali wala pa'y pilde sa 15 ka away diin 11 sa mga biktima niini iyang gipatikangkang.