CEBU, Philippines – Ang University of Southern Philippines Foundation (USPF) Panthers ug ang Tough Gear/Cebu Institute of Technology-University (CIT-U) Wildcats dunay managlahing tuyo sa ilang sangka sa 2019 Cebu Schools Athletic Foundation, Inc. (CESAFI) Partner's Cup karong adlawa diha sa Cebu Coliseum.
Lab-as pang mihaw-as gikan sa 95-92 nga pagpakurat sa University of San Jose-Recoletos (USJ-R) Jaguars nga nakapakgang sa duha ka sagunson nilang pilde niadtong Hunyo 22, ang Panthers naglaraw sa labing una nilang duha ka sunod-sunod nga daog, samtang ang Wildcats nanghinaut nga makadimdim na sa katam-is sa kadaogan human mahagba sa nag-una nilang upat ka duwa.
Apan usa lamang kanila ang makakuha kon unsa'y ilang gusto human sa ilang engkuwentro sa alas-7 sa gabii.
Sa pasiunang aksiyon ubos sa juniors division nga gikatakda sa alas 5:30 sa hapon, ang Cebu Elite-University of San Carlos (USC) Baby Warriors makigharong sa Tough Gear/Southwestern University (SWU)-Phinma Baby Cobras.
Ang Baby Cobras mosuway og angkon og bahin sa liderato uban sa 3-1 Hotel Fortuna-University of Cebu (UC) Junior Webmasters, samtang ang Baby Warriors nagpangagot nga mobangon sa duha ka sunod-sunod nilang pagkasukamod.
Sa kasamtangan, ang Baby Cobras nagbitbit og 2-1 nga baraha sama sa USJ-R Baby Jaguars ug Sacred Heart School-Ateneo de Cebu (SHS-AdC) Magis Eagles, samtang ang Baby Warriors usa pa lamang ang daog sa upat ka duwa.