CEBU, Philippines — Gawas sa mangtas nga trianggulo nilang Kawhi Leonard, KLyle Lowry ug Pascal Siakam sa Toronto Raptors, lain pang milutaw nga problema sa kampo sa Golden State Warriors mao ang sentrong si Marc Gasol.
Nailhan sa iyang abilidad sa depensa ug kamaayo mopasa, si Gasol mipakita nga kasaligan sab siya sa opensa human mikadlit og 20 puntos sa 118-109 nga kadaogan sa Raptors batok sa Warriors sa Game 1 niadtong Biyernes.
Sa maong duwa, si Gasol mipasud og unom sa 10 niya ka itsa apil na ang duha ka tres.
Si Pascal Siakam, ang bida sa Raptors sa pasiunang duwa sa serye, usa sa mga mipauwan og pagdayeg ni Gasol sa gipakita niining katakos ilabi na sa panahon nga siya labing gikinahanglan.
"There's always a sort of kind of comfort when he's on the floor," matud pa ni Siakam. "He's so smart and reads the defense and he's able to protect the rim for us. It's definitely great to have him, a vet that's been through it."
Hasta gani ang karibal nilang si Klay Thompson sa Warriors misaludo sab ni Gasol.
"He turned himself into a very good 3-point shooter," kanayon pa ni Thompson. "Great passer. Very good defender at the rim. That pickup turned out to be huge for them."
Ang tanan nagpamatuod lamang nga sakto kaayo ang lakang sa Raptors nga kubiton si Gasol gikan sa Memphis Grizzlies pinaagi sa usa ka trade niadtong Pebrero. (BANAT NEWS)