CEBU, Philippines — Sa ikaduhang sunod-sunod nga higayon, midaog na sab ang Villalon-Bamba ug ning higayona batok sa Explore Travel & Tours, 77-67 sa LABA Summer League 2019 basketball tournament niadtong Biyernes didto sa Co Tiao King gym sa Tabok, Mandaue City.
Nagkumbinar og 30 puntos sila si Lyle Vasquez ug Omolon aron mangu sa opensiba sa Villalon-Bamba nga alkansi lang og uno punto sa first quarter, 16-17.
Miburot pa ang labaw sa Explore Travel & Tours ngadto sa nubye puntos, 27-18 human mipasud og duha ka sunod-sunod nga tres ni Ebyong Ouano, apan naungot ang ilang iskor human nakahimo og unom ka sunod-sunod nga turnovers nga gipahimuslan sab sa Villalon-Bamba nga milusad og 11-0 aron mailog ang bentaha, 28-27. Wala na molingi pa ang Villalon-Bamba sukad niadto aron mohirit og 2-0 nga baraha.
Ang Explore Travel & Tours nga nasagunsonan og duha ka pilde, gipangulohan ni Apet Cabahug nga mikamada og 14 puntos, gisundan ni Richard Madrid nga adunay 12 puntos.
Ang Explore Travel & Tours wala pa'y daog sa duha nila ka duwa ning maong liga nga ubos sa superbisyon sa presidente niining si P/Capt. Dondon Coloscos inabagan nilang Lloyd Chavez, Macmac Borja ug Roy Ermac.
Sa laing aksiyon, ang Lesin nakarekober human masugamak sa una nilang duwa dihang ilang gipahimungtan ang team Sebandal, 78-69.
Si Jhonnel Escober maoy topscorer sa Lesin pinaagi sa iyang 19 puntos, gisundan ni Richard Lawas nga adunay 11 puntos. Ang team manager niining si Gilbert Lesin, ingon man sila si Barak Recto ug Ariel Ocier mitampo'g 10 puntos matag usa alang ilang 1-1 record, samtang ang Sebandal bokya pa sa duha nila ka duwa.
Midaog sab ang team Sajot batok sa team Gastardo sa iskor nga 72-60.
PUNTOS MATAG USA
Unang duwa:
LESIN (78) – Escober 19, Lawas 11, Recto 10, Lesin 10, Ocier 10, Pacquiao 8, Chavez 5, Ecot 3, Cena 2.
SEBANDAL (69) – Ceniza 17, Asis 14, Ranile 8, Adolfo 7, Capada 6, Perez 5, Basubas 4, Abella 4, Magale 4, Cinco 4.
Ikaduhang duwa:
VILLALON (77) – Vasquez 16, Omolon 14, Bamba 9, Villalon 6, Arreglo 6, Aclibar 6, Gelbolingo 5, Peñaranda 4, Apas 4, Cabarrubias 4, Miñoza 4.
EXPLORE Travel &Tours (67) – A. Cabahug 14, Madrid 12, Ouano 8, Royo 8, Mauro 6, Del Castillo 5, Ermac 4, Beldera 2, Palero 2, Ornopia 2, Alburo 2.