Baraha buk-on
CEBU, Philippines – Parehong naglaraw og krusyal nga daog ang Milwaukee Bucks ug Toronto Raptors sa dihang mag-abot na sab sila sa Game-5 sa NBA Eastern Conference finals karong alas-8:30 sa buntag didto sa Fiserv Forum sa Milwaukee, Wisconsin.
Giharos og daog sa Bucks ang nag-unang duha ka duwa, apan gisagunsonan sab sila og duha ka pilde sa Raptors hinungdan nga nagtabla karon ang ilang 'best-of-seven' series sa baraha nga 2-2.
Mahinungdanon kaayo ang Game-5 alang sa duha ka koponan gumikan kay kun kinsa gani ang modaog niini dako na man ang kahigayonan nga makampiyon.
Seguradong makigpatay ang Bucks aron dili mabihag sa ilang korte gumikan kay kun maparot tataw nga bukid ang ilang tungason kay ang Game-6 molabyog man balik didto sa balwarti sa Raptors.
Aron dili kini mahitabo, kinahanglan nga mowadwad og maayo ang ilang mga bitoon nga gipangulohan nilang Giannis Antetokounmpo, Khris Middleton ug Brook Lopez.
Makalaum sab ang Bucks nilang Nikola Mirotic, Eric Bledsoe, Eryna Ilyasova, George Hill ug Malcolm Bragdon.
Samtang ang Raptors magsandig og maayo sa trayanggulo nilang Kawhi Leonard, Pascal Siakam ug Kyle Lowry.
Lain pang mga pambato sa Toronto mao sila si Marc Gasol, Serge Ibaka, Norman Powell, Fred VanVleet ug Danny Green.
- Latest
