DBTC mitaak reg'l finals sa Allianz bootfest

CEBU, Philippines – Ang Don Bosco Technical College (DBTC) miangkon og tulo ka luna sa regional finals sa 2nd Allianz National Youth Futsal Invitational didto sa Dakbayan sa Bacolod sud ning bulana.

Kini human ang DBTC-A nanghawod sa boys 16 division ug ingon man gibira ang nag-unang duha ka puwesto sa boys 14 age group atol sa Cebu eliminations sa miaging gabii didto sa DBTC field sa Barangay Punta Princesa, Dakbayan sa Sugbo.

Ang top 2 matag dibisyon sa local qualifying mao moabante ngadto sa regional finals.

Tam-is kaayo ang maong daog sa DBTC-A sa boys 16 gumikan kay munasginhawa silang nakasud sa finals.

Ang Guardian Strikers maoy milukat sa unang finals ticket human gidominar ang eliminasyon uban ang nuybe puntos, samtang ang DBTC-A ug Sacred Heart School-Ateneo de Cebu nagtabla bitbit ang kuwatro puntos.

Apan ang DBTC-A maoy mibira sa laing luna sa finals gumikan sa mas taas niining goal difference.

Sa finals, gipatikyaob sa DBTC-A ang Guardian Strikers, 3-1.

Sa boys 14, ang DBTC-A ug DBTC-B nakaangkon og awtomatik nga luna sa regional championships human nanghawod sa eliminasyon bitbit ang 15 ug 10 puntos.

Lain pang miabante sa regionals mao ang Guardian Strikers ug Cebu United sa girls 14 ug ang University of Southern Philippines Foundation (USPF) ug Labangon sa girls 16.