CEBU, Philippines — Hingpit nang giangkon sa Golden State Warriors ang topseed sa NBA Western Conference human midaog sa katapusan nilang duwa sa regular season.
Ang defending champion nga Warriors milubong sa Los Angeles Clippers sa iskor nga 131-104 kagahapon didto sa Oracle Arena.
Ang Oracle maoy balwarte sa Warriors sud sa 47 ka tuig, apan mobalhin na sila sa bag-o nilang korte didto sa San Francisco sunod season.
Emosyonal kaayo si Warriors coach Steve Kerr taliwala sa ilang kadaogan nga naatol sab sa ilang pagpanamilit sa karaan nilang korte.
"Let me just say that for 47 years, Warriors fans have stuck with us through thick and thin," matud pa ni Kerr. "Let's be honest, most of those years have been a little thin."
Sa ilang pagsakmit sa numero unong puwesto sa Western Conference, ang Warriors magabaton og homecourt advantage sa tibuok nga bahin sa playoffs.
Wala pa masayri sa pagka karon kun kinsa ang makontra sa Warriors, apan lagmit ang Clippers maoy ilang makasangka sa playoffs.
Sa laing bahin, ang Houston Rockets mikulit og laing rekord sa dihang ila sab nga gilubong ang Phoenix Suns, 149-113.
Ang Rockets milansang og 27 ka 3-pointers aron buk-on ang kaugalingon nilang rekord alang sa labing daghan nga tres sa usa ka duwa. Ang karaang rekord sa Rockets ilang narehistro sa dihang milansang sila og 26 ka tres batok sa Los Angeles Lakers niadtong Enero ning tuiga.
Sa lain pang resulta, hapit nang napagngan og kahayag ang Miami Heat sa ilang tinguha nga makasud sa playoffs human nakatilaw og pilde sa mga kamot sa Toronto Raptors, 117-109.
Didto sa Minnesota, sila si Russell Westbrook ug Paul George nagkumbinar og 54 puntos ug si Dennis Schroder mikamada og 14 puntos dihang gipakaging sa Oklahoma City Thunder ang Timberwolves, 132-126.
Si Westbrook milangkat og 10 ka rebounds ug mipasa og 15 ka assists alang sa ika-32 niyang 'triple double' karon nga season.