Talisay City Aquastars abante quarterfinals

CEBU, Philippines — Ang Talisay City Aquastars  mipaduol sa pagdepensa sa ilang titulo human miangkon og awtomatik nga luna sa quartefinals sa Cebu Governor's Cup Inter-Cities and Municipalities Under 21 Developmental Basketball Tournament.

Gitak-op sa Aquastars ang ilang kampanya sa eliminasyon pinaagi sa pagpatikangkang sa San Fernando Spartans, 74-63 aron sa paglugwa   isip topseed sa 1st District bitbit ang 4-1 record.

Mokuyog uban sa Talisay sa sunod nga hugna mao ang Minglanilla Archangels  nga nakalihay sa sayong pagkatagak human gipulbos ang Sibonga Pillars, 101-57.

Ang Minglanilla nagtabla tuod ug ang Naga City Electrifiers ug Carcar City Lechoneros sa managsamang 3-2 records, apan ang Minglanilla maoy miangkon sa katapusang luna sa quarterfinals sa ilang cluster kortesiya sa mas taas niining quotient.

Sa dihang gibuak ang panagtabla, ang Minglanilla maoy nimarka sa labing taas nga quotient nga 1.036. Ang Naga nakakuha lamang og 1.032, samtang ang Carcar adunay 0.93.

Sa 2nd District, ang Argao ug Samboan maoy mibira og luna sa quarterfinals bitbit ang parehong 4-1 nga  baraha.  Susama sab ang nakab-ot sa Tuburan ug Balamban sa 3rd District nga dunay kaluhang 3-1 records.

Sa laing bahin, ang Talisay ug Minglanilla mag-ilog sa titulo sa 1st District karong Miyerkules diha sa Talisay City Sports Complex. 

Sa susamang adlaw, ang Tuburan ug Balamban magsangka sab alang sa korona sa 3rd District didto sa Tuburan municipal gym.

Ang mga mananaog garantisado nga makadawat og P100,000 nga insentibo.