CEBU, Philippines — Gipatilaw sa Lions ang Rams og pilde sa labing unang higayon, 89-79, sa Elite Basketball Club Cebu Season 14 nga gipaluyohan sa Tough Gear Sportswear diha sa Visayan Glass Gym sa Barangay Guadalupe, dakbayan sa Sugbu.
Si Jefford Aldave migtali og 21 puntos ug si Jon Chua midugang og 14 puntos alang sa Lions, nga miinat sa sayo nilang 25-17 nga labaw ngadto na sa 16 puntos sa halftime, 50-36.
Nakasikit ang Rams ngadto na lang sa kuwatro puntos human sa tulo ka kuwarter, 60-56, apan mibawos og pahit ang Lions sa naghinapos nga bahin sa duwa aron kubiton ang 10 puntos nga kadaogan.
Sila si Rob Abayon ug Jonathan Reyes parehong mihipos og 12 puntos alang sa Lions nga nagtangag na karon og 2-2 baraha.
Si Phalang Linda dunay 20 puntos, samtyang sila si Winly Besin, Harmsway Molina, ug Gabe Dayanan nagkumbinar og 40 puntos apan nakawang ilang paningkamot kay naputol ang tulo ka sagunson nga daog sa Rams.
Ang Rams natagak ngadto sa 3-1 uban sa Tigers, nga mikadlit sa ikatulo nilang daog human gipaak ang Wolves, 99-89.
Si Chris Obeso maoy nangu sa Tigers uban ang 30 puntos inabagan nilang Joel Bensig nga dunay 26 puntos ug Jojie Bas nga mi-iskor og 23.