Gesta gipaundang ni Rodriguez

CEBU, Philippines — Sa unang higayon,  napilde pinaagi sa knockout ang US-based Cebuano boxer nga si Mercito Gesta human siya gipaundang sa ikasiyam nga hugna sa Mehikanong si Juan Rodriguez  sa ilang super lightweight bout kagahapon didto sa California.

Si Gesta agresibo sa pagsugod sa sangka diin girumbo niya ang lawas ni Rodriguez, apan kanunay siya masango sa counter-punch sa Mexican boxer.

Nagbinayloay og mga kumo ang duha sa   four ug five rounds hangtod nga si Gesta  nagisian sa iyang duha ka kilay  nga naigo sa mga suntok  ni Rodriguez.

Inanay nga mipakita og kaluya si Gesta sa sixth round dihang nagsige siya og sagang ug sandig sa pisi. 

Sa ninth round, si Gesta gibirahan  ni Rodriguez og kusog nga kombinasyon sa ulo ug wala na siya kalihok pa nga nakapaaghat ni referee Zachary Young sa pag-undang sa away sa 2:55 sa maong round.

Si Gesta nga laraw unta nga  manuktok  pagbalik  alang sa world title shot nakatilaw sa ikatulo niyang pilde sa 37 ka sangka, samtang si Rodriguez miinat sa iyang record nga 30-7, 26KOs.