CEBU, Philippines – Si Jimmy Butler miposa og 15 sa iyang 22 puntos sa katapusang kuwarter, apil na ang krusyal niyang jump shot nga maoy nag-agak sa Philadelphia 76ers ngadto sa 118-115 nga kadaogan batok sa Boston Celtics sa gubot pa sa lukot nilang sangka sa NBA kagahapon didto sa Philadelphia.
Wala sab magpabitin si Joel Embiid nga miburak og 37 puntos uban ang career-high nga 22 ka rebounds ug upat assists alang sa Sixers nga mikulit sa una nilang daog batok sa Celtics karon nga season aron inaton ang sagunson nilang daog ngadto sa unom ka duwa.
Nahimo hinuon nga sentro si Embiid sa miulbong kasamok sa ikatulong kuwarter nga miresulta ngadto sa pagka-eject ni Marcus Smart sa Celtics.
Basi sa replay, nakita nga si Embiid misuway og babag ni Smart gamit ang iyang siko hinungdan nga mibukal ang dugo ni Smart.
Sa iyang kapungot, gilayog ni Smart si Embiid ngadto sa sawog nga miresulta ngadto sa lamok-lamok.
Wala hinuo'y negatibong reaksiyon si Embiid taliwala sa miulbong kainit ug ang mga opisyal dali nga mi-eject ni Smart.
Pait ang maong kaparotan alang sa Celtics nga naglabaw pa og 14 puntos, 60-46 sa ikaduhang kuwarter.
Si Kyrie Irving miratsada og 36 puntos alang sa Celtics nga natagak ngadto sa 43-29, samtang ang 76ers mipahugot sa ilang pagkupot sa ikatulong puwesto sa Eastern Conference bitbit ang 47-25 record.
Sa lain pang mga resulta, ang Orlando Magic miihaw sa New Orleans Pelicans, 119-96, ang Miami Heat mipakaging sa San Antonio Spurs, 110-105. Midaog sab ang Portland TrailBlazers batok sa Dallas Mavericks, 126-118, ang Utah Jazz milubong sa New York Knicks, 137-116 ug ang Chicago Bulls misungag sa Washington Wizards sa iskor nga 126-120.