Vallena bag-ong coach sa cit-u Wildcats

CEBU, Philippines – Giangkon ni Edsel Say Vallena nga saksak sinagol ang iyang pagbati human  gidawat ang tahas isip head coach sa Cebu Institute of Technology-University (CIT-U) Wildcats sa umaabot nga Cebu Schools Athletic Foundation, Inc. (CESAFI) basketball season.

Hulipan ni Vallena si Bembem Alcaraz nga adto na magpokus sa Wildkittens, ang high school varsity sa CIT-U.

Ang beteranong coach nagkanayon nga gibati siya og tumang kahinam nga mo-coach og balik sa team, apan sa susamang higayon dunay gamay nga kabalaka kay sayod siya sa gibug-aton sa obligasyon nga iyang pas-anon uban sa Wildcats.

Si Vallena unang mi-coach sa Wildcats sa labing unang season sa CESAFI niadtong 2001. Nakalahutay sila sa finals, apan gipilde sa University of the Visayas (UV) Green Lancers.

Usa sa mga pambato sa CIT-U sa dihang nagduwa pa sa kolehiyo, usa sab ka title contender si Vallena. Uban ni Gilbert Demape, ilang gihatod ang Wildcats ngadto sa kampiyonato sa Cebu Amateur Athletic Association (CESAFI na karon) niadtong 1994 galing lang kay gibuntog sila sa Cebu Doctors College Stallions.

Si Vallena, ang kasamtangang head coach sa Danao City sa Cebu Governor's Cup basketball tournament pormal nga moasumir sa iyang puwesto karon pang Abril, apan iya nang giandam daan ang iyang kaugalingon sa malisud nga misyon nga nagpaabot kaniya. Mipasalig si Vallena nga iyang hulmahon ang Wildcats ngadto usa ka kataahan nga koponan sa CESAFI.