CEBU, Philippines — Pulos gipaundang sa duha ka Pinoy ring stars nga sila si Dave 'Hunter' Peñalosa ug Johnriel 'Quadro Alas' Casimero ang tagsa-tagsa nila ka mga langyawng kaatbang niadtong miaging gabii didto sa SkyDome sa Quezon City.
Ang pag-umangkon ni Pinoy boxing legend Gerry Peñalosa gna si Dave mirehistro sa labing dakong kadaugan sa iyang nagsaka nga boxing career human niya gipaundang sa fourth round ang veteran Mexican nga si Marcos Cardenas.
Sama sa gilauman, nasuwayan si Peñalosa tungod sa ka-agresibo ni Cardenas kinsa nakigsinukliay kaniya og kumo. Hinuon, nakita ang pabor sa kusug sa Pinoy prospect nga mipugos sa Mehikano nga modepensa sa iyang ulo.
Tungod kay nagpunay og tabon sa ulo, si Peñalosa miatake sa bodega ni Cardenas kinsa nalup-og sa 2:47 sa fourth round.
Sa maong kadaugan, si Peñalosa misaka sa record nga 15-0, 11KOs.
Sa iyang bhain, ang kanhi two-division champ nga si Casimero mipakita nga dili pa siya laos human niya gitapos ang Hapon nga si Kenya Yamashita sud sa 47 segundos sa round six.
Kini ang labing unang away ni Casimero sa bantamweight division diin laraw niya nga mamahimong three-division world champ sunod nila ni Manny Pacquiao, Nonito Donaire ug Donnie Nietes.