Sharks gisardinas

CEBU, Philippines – Ang Cebu City Sharks nahutdan og kusog sa panahon  nga  kini  ilang gikinahanglan hinungdan nga naapil sila sa pagkabaling sa Zamboanga Family's Brand  Sardines, 58-61 sa Maharlika Pilipinas Basketball League (MPBL) Datu Cup niadtong Lunes sa gabii didto sa Marist School gymnasium sa Marikina City.

Abante og siyete puntos human sa tulo ka kuwarter, 43-36, ang Sharks mikolapso  dihang mibawos ang   Zamboanga pinaagi sa ilang 16-7 rally aron ilogon ang labaw sa iskor nga 52-50 sa tunga-tungang bahin sa katapusang kuwarter.

Igo lamang nakatabla ang Sharks, 54-54 human sa basket ni Victor Nunez sa  katapusang  3:12  sa duwa gumikan kay ang Zamboanga mikayod og maayo aron pag-eskapo niini ngadto sa tres puntos nga kadaogan.

Duna pa unta'y tsansa nga maka-overtime ang Sharks, apan wala masud ang 3-pointer ni Patrick Cabahug dayong kapupos sa oras.

Bisan pa og napilde, ang  Sharks dako gihapon og purohan nga makasud sa playoffs sa Southern Conference  bitbit  ang 11-13  win-loss  record.

Si Edrian Lao maoy nangu usa Sharks uban ang 12 puntos, si Cabahug dunay 11 puntos, samtang si William McAloney mitali og otso puntos sa pilderong koponan.

Ang Zamboanga gipangulohan ni Ryan Buenafe nga mitagak og 13 puntos, sila si Ivan Villanueva, Reed Friar Juntilla ug Robin Rono nagkumbinar og 33 puntos sa Zamboanga nga mipahayag sa ilang tsansa nga makatikang sa playoffs uban ang 10-12 nga baraha.