Albindo maninguha mohimo og impresibong daog sa sogod
CEBU, Philippines – Maningkamot si undefeated Cebuano mixed martial arts fighter Allan Albindo sa Yaw-Yan ArDigma Cebu nga makahimo og impresibong daog batok ni Jessie Cabalquinto sa Two Edge MMA sa ilang sangka sa 'Sogod Unleashed' karong gabii didto sa Sogod gym sa Sogod, Cebu.
"Dili sayon ako kontra kay taas siya experience. Instructor sab siya sa ilang team pero maninguha ko nga modaog," matud pa ni Albindo. "Ako plano, dili gyud paabton og decision. Maningkamot ko nindot ako performance by knockout or submission."
Si Cabalquinto usa ka last-minute replacement fighter kay wala kakuha og timbang ang orihinal nga kaatbang ni Albindo nga si Odie Lejarde.
Gawas ni Albindo, laing tulo ka Yaw-Yan ArDigma fighters ang mopakita og aksiyon nga mao sila si Clint Bahala, Ken Rivera ug Josh Ybañez.
Si Bahala moharong ni Robert Baligasi sa Arcumjucai, samtang si Rivera mobatok ni veteran John Edu Torbiso sa Durex Dragon ug si Ybañez makigbangga ni Kenz Torreon sa SelDef Lapu-Lapu.
Mokumpleto sa fight card mao ang sangka nila ni Manases Gaudan batok Christian 'Baby Folayang' Tabunag, Jessie Cabalquinto batok Edmund Vergara, Ariel Rigodon batok Johnman Hera, Tj Nies batok Jade Semacio, Krista 'Triangle' Barbosa batok Alliah 'Striker' Torbiso, Matthew Israel batok Denmark Comainking ug Adi Penaranda batok Nico Cosep.
- Latest
