CEBU, Philippines — Hinay-hinay na nga nakarekober sa iyang groin injury si LeBron James, apan si Los Angeles Lakers coach Luke Walton miingon nga dili niya athon iyang superstar ug iya ra kining paduwaon kun hingpit na nga maalim ang angol niini.
Si Walton mipagawas og pamahayag nga dili pa moduwa si James human mikatap ang balita nga paduwaon na niya si James karong adlawa batok Los Angeles Clippers.
Bisan naglisud sila sa ilang kampanya sukad ma-injured ang three-time champion, si Walton miingon nga gusto siya nga maseguro ang kahimsog ni James.
Si James katapusang miduwa niadto pang Pasko ug sa iyang pagkawala, igo lang midaog og unom sa 11 ka duwa ang Lakers.
Nanghinaut hinuon si Walton nga magpadayon pa ang nindot nga kalamboan sa recovery ni James ilabi na nga nag-atubang og lisud nga six-game road trip ang Lakers diin lakip niini ang sangka batok defending champion Golden State Warriors karong Lunes.