CEBU, Philippines – Dili na makaduwa pa sa nahibilin nga bahin sa NBA season ang star guard sa Indiana Pacers nga si Victor Oladipo tungod sa seryosong knee injury nga iyang nahiaguman.
Kahinumduman, si Oladipo mikolapso sa korte sa ikaduhang kuwarter atol sa 110-106 nga kadaogan sa Pacers batok sa Toronto Raptors niadtong Huwebes.
Human matagak sa korte samtang gidepensaan si Raptors forward Pascal Siakam, gikuptan ni Oladipo ang tuo niyang tuhod ug nagping-it sa kasakit.
Human sa serye sa paghiling, gikopirmar sa Pacers nga si Oladipo dunay gisi sa tuway-tuway sa tuo niining tuhod. Kinahanglan kini nga operahan ug dili na makabalik pa og duwa karon nga season.
"He will undergo surgery at a date to be determined and will be out for the season," tipik pa sa opisyal nga pamahayag sa Pacers.
Ang pagkawala ni Oladipo daw usa ka makabungog nga suntok nga miigo sa apapangig sa Pacers nga nahimutang karon sa ikatulong puwesto sa Eastern Conference standings bitbit ang 32-15 record.
Karon nga wala na uban kanila ang 26-anyos nga si Oladipo, ang ilang topscorer nga dunay average nga 19.2 puntos matag duwa, walay duda nga lisud nga hagit ang nagpaabot sa Pacers sa unahan.