Irving mihimo'g career-high 18 ka assists

CEBU, Philippines – Mihimo og fade-away jumper si Kyrie Irving ug dayon mitusak og layo kaayong tres sa hinapos nga bahin sa duwa aron agakon ang Boston Celtics ngadto sa 117-108 nga kadaogan batok sa nagharing Toronto Raptors sa NBA kagahapon didto sa TD Garden sa Boston, Massachusetts.

Hait ang tinirahan bisan asang anggulo, si Irving mitapos uban ang 27 puntos nga iyang gidayan-dayanan og career-high 18 ka assists timaan sa iyang kangilngig.

Apil sa mga nindot nga assists ni Irving maoy nagdagkot sa panapos nga 17-4 run nga maoy nakapuhag sa Raptors.

Si Al Horford miamot og 24 puntos ug si Jayson Tatum adunay 16 puntos ug 10 ka rebounds alang sa Celtics nga mibalik sa ilang tugkaran nga madaugon human nasagunsonan og tulo ka pilde didto sa teritoryo sa ilang mga kontra.

Si Kawhi Leonard mipatuasik og 33 puntos ug si Serge Ibaka mikolekta og 22 puntos ug 10 ka rebounds sa Raptors, kansang lima ka sunod-sunod nga daog naputol. Nagbitbit na sila karon og 33-13 record.

Sa laing mga duwa, ang Detroit Pistons mibaraw sa Orlando Magic, 120-115, ang Milwaukee Bucks midaog sa Memphis Grizzlies, 111-101, nakaipsot sab ang San Antonio Spurs batok sa Dallas Mavericks, 105-101.

Ang Golden State Warriors mitiklo sa New Orleans Pelicans, 147-140, ang Brooklyn Nets mipukan sa Houston Rockets, 145-142, ang Portland TrailBlazers midaog sa Cleveland Cavaliers, 129-112 ug ang Utah Jazz mipukan sa L.A. Clippers, 129-109.