Lamar Odom gikuhang import sa Philippines

CEBU, Philippines – Kanhi NBA champion ug Olympic gold medalist nga si Lamar Odom moduwa sa  Mighty Sports PH nga  maoy morepresentar sa Pilipinas sa Dubai International Basketball Tournament sa Pebrero sunod tuig didto sa Dubai.

Mao unya kini ang pagbalik og duwa ni Odom. Katapusang mipakita og aksiyon si Odom isip import sa Euroleague. 

Si Odom, nga misakmit og duha ka NBA title uban sa Los Angeles Lakers niadtong 2011, miretiro sa NBA niadtong tuig 2013 uban sa L.A. Clippers.

Ang 14-year NBA veteran nga si Odom nga  nakontrobersiyal sa miaging tuig dihang diriyot kini makabsi sa iyang kinabuhi tungod sa drug overdose,  mahimong labing sikat nga import sa maong Dubai League.

Ang Mighty Sports ni coach Charles Tiu, hinay-hinay karon nga miporma og lig-ong koponan diin posible nga ikauban ni Odom isip ikaduhang import sa Mighty ang PBA mainstay nga si Justin Brownlee.