Damgo sa batang Fil-Canadian natuman

CEBU, Philippines — Damgo nga natuman.

Mao kini ang naangkon sa batan-ong Filipino-Canadian nga basketbolista nga si Zachary Walker. Duha ka semana ang milabay, ang 10-anyos nga si Walker kalit nga misulbong ngadto sa tumang pagkasikat gumikan sa video diin makita ang talagsaon niyang abilidad ug kahanas pagdribol sa bola bisan sa linghod niyang pangedaron.

Nahitabo kini sa exhibition game tali sa mga miyembro sa Filipino Basketball Association atol sa halftime sa duwa tali sa Toronto Raptors ug New Orleans Pelicans niadtong Nobiyembre 13 didto sa Scotiabank Arena sa Torondo, Canada.

Ang video nga nagpasundayag sa talento ni Walker nag-viral human kini gi-share sa NBA sa Instagram ug ingon man sa nagkadaiyang online sports news outlets.

Walay kalibotan si Walker nga usa diay sa mga nakakuha og atensiyon sa iyang gibuhat mao ang iyang idolo nga si  Stephen Curry sa Golden State Warriors.

Gawas nga midayeg, si Curry misuwat sab og makapadasig nga mensahe ngadtong ni Walker pinaagi sa Instagram. Dili lang kana maoy naangkon nga pahalipay ni Walker, nakapahimus sab siya sa bililhong kahigayonan nga mahimamat si Curry kagahapon sa wala pa ang duwa tali sa Warriors ug Raptors didto sa Scotiabank Arena.

Makita sa panagway ni Walker ang dili hitupngang kalipay nga personal niyang makita ug makaestorya si Curry.