Gilas batok Kazakstan

CEBU, Philippines – Duha ka Sugboanong higante nga sila si JuneMar Fajardo ug Greg Slaughter maoy   mangulo   sa  Team    Pilipinas  nga makigbatok sa Kazakhstan sa pagpadayon sa 2019 FIBA World Cup qualifiers karong gabii didto sa Mall of Asia (MOA) Arena. 

Ang duwa sugdan sa alas-7:30  gabii.

Sila si Fajardo ug Slaughter gilauman nga modominar sa opensa ug makaiskor og dako   tungod sa ilang gidak-on ug gitas-on batok sa mas gagmay nga Kazakhstan 

Kini ang labing unang higayon nga dungan sa pagduwa   sa nasudnong koponan sila si Fajardo ug Slaughter.  

Ang Team Pilipinas  mangambisyon og usa ka two-game sweep sa duha nila ka home games.

Ang Team Pilipinas kasamtangan nga anaa sa ikatulong dapit sa group stage sa ilang 5-3 nga baraha sunod sa Iran (6-2) ug Australia (7-1).

Ang kadaogan sa national team batok Kazakhstan mohatag kanila og dakong kompiyansa alang sa ilang 'rematch' uban sa Iran karong Lunes.

Sila si Fajardo ug Slaughter moduwa uban nila si Japeth Aguilar, Stanley Pringle, JP Erram, LA Tenorio, Scottie Thompson, Beau Belga, Matthew Wright, Alex Cabagnot ug Gabe Norwood.

Samtang sila  si   Jayson Castro ug Christian Standhardinger gireserba ni coach Yeng Guiao alang sa duwa batok Iran. (BANAT NEWS)