Cebu Blue Marlins nanghawod sa Dapitan

CEBU, Philippines – Wala makawang ang hataas nga biyahe sa Cebu Blue Marlins gumikan kay sila maoy nanghawod sa 1st Mayor Rosalina G. Jalosjos Swim Meet niadtong weekend didto sa Jose Rizal Memorial University sa Dapitan City.

Ubos sa pagtimon ni coach Rolando Alvarez, ang Blue Marlins maoy  kampiyon sa competitive division uban ang 612 puntos gikan sa 23 ka gold, 15 ka silver ug 24 ka bronze medals nga ilang nasawom.

Nalabog sa halayo nga ikaduhang dapit ang Dipolog Aqua Warrior Swimming Club uban ang 382.50 puntos, samtang ang Dipolog Blue Marlin Swimming Club  nalandig sa ikatulong puwesto uban ang 361.50 puntos.

Ang CBM mitapos sab isip first runner-up sa novice division bitbit ang lima ka golds, unom ka silvers ug 10 ka bronzes.

Gawas niini, tulo ka mga batos sa CBM ang gibayaw sab nga Most Outstanding Swimmers sa ilang age groups. 

Kini mao sila si Karen Mae Indaya (competitive 18-above), Quintin Zee Sabalande (9-10) ug James Aaron Pardinas (novice 11-12).