Misaad og knockout
CEBU, Philippines – Nasayud sila si ALA Boxing Gym prospects Jeo ‘Santino’ Santisima ug ‘Prince’ Albert Pagara nga dagkong oportunidad ang nagpaabot kanila kung mudaog sila batok sa tagsa-tagsa nila ka mga langyawng kaatbang rasun nga pulos sila misaad nga mohimo og knockout atol sa ‘Pinoy Pride 45: Quest for Greatness’ fightcard karong gabii didto sa IEC Convention Center sa Barangay Mabolo, Cebu City.
Si Santisima (16-2, 14KOs) kinsa modepensa sa iyang WBO Oriental super bantamweight title batok Mexican champion Uriel ‘Yuca’ Lopez (13-6, 6KOs) sa main event, nagkanayon nga sayuhun niya pagtapos iyang kaatbang kung makakita siya og kahigayunan.
“Lig-on gyud na ang mga Mexican mao nga ako gyud humanon dayun ang away kung makakita ko og chance. Dili na nako paabton og 12 rounds,” matud pa ni Santisima kinsa mitimbang og 122 pounds, bug-at og usa ka libra sa iyang Mehikanong kaatbang atol sa official weigh-in kagahapon didto sa SM City Cebu activity center.
“Jeo really has the potential to be a world title challenger in the future,” matud pa ni ALA Promotions President Michael Aldeguer. “This will be crucial for him to see if he has what it takes to make it big time. We are pitting him against a dangerous Mexican and it’s now up for him to prove his worth.”
Si Pagara (30-1. 21KOs), sa iyang bahin, kompiyansa nga mapanalipdan niya iyang WBO Intercontinental super bantamweight title batok sa Ghanaian knockout artist nga si George Krampah (14-3, 12KOs) sa supporting main event.
“Kung imo tan-awon iyang record, knockout sad iyang hilig mao na nga sure ko nga di ni maabtan og 12 rounds. Seguruon nako nga ako mudaog ani nga away kay ipakita nako nga nakabalik nako,” matud pa ni Pagara.
Sa laing title fight, ang way pilde nga si Kevin Jake Cataraja (8-0, 7KOs) makigbinukbukay sa Mehikanong si Hugo ‘Scarface’ Reyes (9-1, 7KOs) alang sa WBO Youth super flyweight belt.
- Latest
