CEBU, Philippines — Ang star guard sa Miami Heat nga si Josh Richardson gipamulta og $25,000 (P1.25 million) sa NBA gumikan sa paglabay niini sa usa sa iyang sapatos atol sa usa ka duwa.
Ang insidente nahitabo sa nahibiling 6:31 sa katapusang kuwarter atol sa kapildihan sa Heat ngadto sa L.A. Lakers, 113-97 didto sa ilang korte niadtong Lunes.
Si Richardson gitawgan og 'technical foul' ug na-ejected sa duwa gumikan sa iyang gibuhat nga usa ka kalapasan sa mga lagda sa liga.
Mao kadto ang labing unang higayon nga na-ejected ang 25-anyos nga Amerikano sa usa ka duwa sud sa upat ka season niini sa NBA.
Si Richardson maoy lider sa Heat uban sa average niining 20.4 points, 4.0 rebounds, 3.3 assists ug 1.06 steals matag duwa karon nga season.