Embiid miarte

CEBU, Philippines — Mikamada og 41 puntos ug milangkat og 13 ka rebounds si Joel Embiid aron mangulo sa scoring sa Philadelphia 76ers nga  mipukan sa Los Angeles Clippers, 122-113 sa ilang duwa sa NBA kagahapon  didto sa Wells Fargo Center sa Philadelphia, Pennsylvania.

Ikaunom kini nga duwa ni Embiid karon  nga season diin siya miiskor  og dili momenos 30 puntos ug 10 ka rebounds.

Si Ben Simmons mitampo  og 14 puntos ug 11 ka assists, samtang si Markelle Fultz miamot og  12 puntos, siyam ka rebounds ug lima ka assists alang sa Sixers nga nagpabiling walay pilde sud sa lima ka duwa didto sa ilang korte.

Si Lou Williams mi-iskor og 26 puntos alang sa Clippers ug si Danilo Gallinari mipuntos og 25  sa pilderong kawsa.

Didto sa Boston, si Kyrie Irving miposa og unom ka tres sa iyang 28 puntos sa dihang  ang Celtics nakaipsot batok  sa Milwaukee Bucks, 117-114.  

Si Gordon Hayward mikadlit og season-high 18 puntos, si Al Horford duna sa'y 18 puntos ug si Marcus Morris miamot og 17 puntos alang sa Celtics.

Human makapalta og usa ka duwa, si Giannis Antetokounmpo miratsada dayon og 33 puntos ug 11 rebounds, apan nahuyhoy gihapon ang iyang abaga gumikan kay ang Bucks nakatilaw sa labing una nilang pilde.

Sama nilang Embiid ug Irving, mikuha sab og atensiyon si De'Aaron Fox nga mirehistro og career-high 31 puntos, 15 assists ug 10 rebounds alang sa labing una niyang 'triple-double' sa dihang gihimulbolan og maayo sa Sacramento Kings ang Atlanta Hawks, 146-115 alang sa ikalima nilang sagunson nga daog.

Sa uban pang mga resulta, si Russell Westbrook mipadahunog og 29 puntos, 10 ka assists ug walo ka rebounds alang sa Oklahoma City Thunder nga nakabangon human malubong og 19 puntos sa ikatulong kuwarter dayon na ngadto sa pagpakaging sa Charlotte Hornets, 111-107, samtang sila si Juancho Hernangomez ug Paul Millsap nagkumboya og 39 puntos sa dihang gipatiurok sa Denver Nugets ang nagkagidlay nga Cleveland Cavaliers, 110-91 ug ang Portland TrailBlazers midaog sab pinaagi sa paglubong sa New Orleans Pelicans sa iskor nga 132-119.