Engkuwentro sa mga bitoon

CEBU, Philippines — Ang labing tang-an ug labing sanag nga mga bitoon sa 18th Cebu Schools Athletic Foundation, Inc. basketball season mao na sab ang masentro sa atensiyon gumikan kay magtakus sila sa ilang abilidad sa  CESAFI All-Star Games karong hapon diha sa Cebu Coliseum.

Tunga-tunga sa mga duwa nga magsugod sa engkuwentro sa high school division sa ala-1 sa hapon mao ang Slam Dunk contest ug 3-point shootout.

Sa labing unang higayon sukad kini mahimugso niadtong 2000, ang CESAFI magsubay og Team Fajardo vs. Team Slaughter format sa college ug Team Tallo vs. Team Desiderio sa high school agi'g pagtamod sa mga banggiitang   produkto sa liga nga  nakahimo og maayo  sa Philippine basketball.

Ubos sa pagtimon ni coach Gary Cortes, ang Team Slaughter armado nilang Rey Anthony Suerte, Ubert Villaceran, Jiezel Tarrosa, Jancork Cabahug, Gileant Delator ug Jafet Claridad sa two-time defending champion University of the Visayas (UV) Green Lancers. Makig-alyansa sila nilang Segemars Eewnike, Elmer Exchavez, Juan Miguel Gastador ug Jaybie Mantilla   sa    University of   San   Jose-Recoletos (USJ-R)      Jaguars,    Red     Cachuela    ug Shaq Imperial sa Southwestern  University (SWU)-Phinma     Cobras, ug Kevin Oleodo ug Jessie Aloro sa Cebu Institute of Technology-University (CIT-U) Wildcats.

Ilang banggaon ang puwersa sa Team Fajardo ni coach Yayoy Alcoseba nga pangulohan nilang Frederick Elombi, Paul Galinato, John Calvin Jabello, Joven Tagudin, Justine Dacalos, Darrell Shane Menina ug Peter Paul Codilla sa University of Cebu (UC) Webmasters.

Ikauban nila mao silang RJ Dinolan ug Nicole Ubalde sa USJ-R, Rodelio Cauba sa University of Southern Philippines Foundation (USPF) Panthers, Mark Kong ug Kenny Rogers Rocacurva sa CIT-U,  John Reel Saycon sa University of San Carlos (USC) Warriors ug Reeve Ugsang ug William Polican sa SWU-Phinma.

Sa high school, ang Team Tallo ni coach Rommel Rasmo pagabidahan nilang Leobert Casinillo, Rey Lewis, Koko Tuadles, Michael Cutamora ug Joseph Fuentebella sa Sacred Heart School-Ateneo de Cebu (SHS-AdC) Magis Eagles, Isaiah Blanco ug Jerick Ranido sa UC, Carlos Garcia ug Renzo Abines sa   CIT-U,  Joshua Canoy sa Don Bosco, Khadshein Tagalog sa USC ug Rojan Montemayor ug Aaron Oyao  sa  USPF, Matthew Flores sa SWU-Phinma ug Matthew   Paras   sa USJ-R.

Sangkaon nila ang Team Desiderio ni coach Jun Pepito  nga moparada  nilang  Gabriel Cometa, Albert Sacayan, Berin Laurente, Mar Leandro Actub  ug  Joshua Yerro sa UV, Juan Raphael Garro ug Clint Octaviano sa USC, Kendrick Abarquez ug Kevin Guibao sa USJ-R, John Maglasang ug Christopher Isabelo sa USPF, Mathew Prince sa CIT-U, Brian Santillan sa SWU-Phinma, Ric Rodriguez sa Cebu Eastern College (CEC)  ug Justin Mondares sa UC.