Jazz gihigtan si Mitchell

Si Donovan Mitchell nga maoy nangu sa tanang mga rookies sa miaging season pinaagi sa pagrehistro og 20.5 puntos matag duwa, gihigtan sa Utah Jazz hangtod sa 2019-2020 season. Gawas nga nanghawod sa pinuntosay, ang 22-anyos nga si Mitchell maoy midaog sa Slam Dunk contest atol sa All-Star Games. Mipatik sab siya og rookie record human  miposa og 187 ka tres sa usa ka season. Nakaangkon siya og unanimous spot sa  2017-2018 NBA All-Rookie First Team, apan ang Rookie of the Year award adto napunta ni Ben Simmons sa Philadelphia 76ers.

Yao Ming mitikang sa North Korea

Ang kanhi NBA superstar  nga si Yao Ming misaksi sa basketball exhibition game tali sa China ug North Korea didto sa Pyongyang. Wala hinuon motan-aw ang presidente sa North Korea nga si Kim Jong Un sa maong talagsaon nga kalihukan. Human sa duwa, ang kanhi sentro sa Houston Rockets nagpakuha og hulagway uban sa mga magduduwa sa China ug North Korea. Human sa walo ka season sa NBA, si Yao Ming miretiro kay gihamok og sunod-sunod nga injury sa iyang tiil. Siya karon ang pangulo sa Chinese Basketball Association.