CEBU, Philippines — Mahibaw-an na karon kun angay pa ba nga mahimong world champion si ALA Boxing Gym fighter Milan 'El Metodico' Melindo sa iyang paghagit ni Japanese champion Ken Shiro alang sa WBC light flyweight title didto sa Yokohama Arena sa Japan.
Ang 30-anyos nga si Melindo gusto nga mabalik sa estado isip usa ka Pinoy world champion human mahanaw sa mga kamot niya ang iyang IBF title niadtong miaging tuig human mapilde ngadto sa laing kampiyon sa Japan nga si Ryoichi Taguchi.
Si Melindo nga giubanan sa iyang mga trainers nga sila si Edito ug Edmund Villamor, masaligon nga modaog ilabi na nga anaa kaniya ang pabor kun kasinatian ang hisgutan.
Si Melindo misulong didto sa Japan uban ang 37-3, 13KOs record, samtang si Shiro adunay rekord nga 13-0, 7KOs.
Bisan pa niini, si Melindo mao gihapon ang 'underdog' tungod kay si Shiro giisip nga usa ka batan-ong boxing star sa ilang nasud.
Sa katapusan niining away, si Shiro mipatumba ni kanhi Mexican world champion Ganigan Lopez sa ilang sangka niadtong Agosto.