CEBU, Philippines – Sud lamang sa duha ka adlaw nga gintang, ang mga higante sa liga nga University of the Visayas (UV) Green Lancers ug University of Cebu (UC) Webmasters mopakita na sab og aksiyon batok sa tagsa-tagsa nilang kaatbang sa 18th Cebu Schools Athletic Foundation, Inc. (CESAFI) men's basketball tournament karong adlawa diha sa Cebu Coliseum.
Niadtong Martes sa gabii, ang Lancers milatos sa Cebu Institute of Technology-University (CIT-U) Wildcats sa iskor nga 98-79, samtang ang Webmasters milatigo sa University of Southern Philippines Foundation (USPF) Panthers, 65-56.
Gumikan niini, ang Lancers nagsolo na karon sa ikaduhang dapit sa liderato bitbit ang 7-3 win-loss record, samtang ang Webmasters mipahugot sa ilang pagkupot sa liderato uban ang 9-1 nga baraha.
Ang duha ka koponan nagtinguha nga mopatigbabaw batok sa tagsa-tagsa nila ka mga kaatbang aron sementohon ang ilang kampanya nga makabira og 'twice-to-beat' incentive sa semifinal round.
Ang Lancers mohamag batok sa University of San Carlos (USC) Warriors sa pasiunang duwa sa alas- 5:15 sa hapon, samtang ang Webmasters makigtige sa University of San Jose-Recoletos (USJ-R) Jaguars sa main game sa alas-6:45 sa gabii.
Gikinahanglan nga modaog ang Lancers batok sa Warriors ilabi na kay nag-atang kanila ang Webmasters sa katapusan nilang duwa sa eliminasyon.
Kun molampus, angkunon sa Lancers ang No. 2 spot ug ingon man ang 'twice-to-beat' advantage sa Final 4 nga wala na'y komplikasyon kun ugaling pildihon sa Webmasters ang Jaguars nga nagtangag karon og 6-3 nga baraha.
Sa laing bahin, ang 4-6 nga Warriors naglaraw sab nga mokulit og krusyal nga daog gumikan kay hugot man ang ilang kumbati sa 5-6 Panthers alang sa ikaupat ug katapusang luna sa semifinal.