Columbian, rain or shine maninguha modaog

CEBU, Philippines – Parehong nabutang sa delikadong sitwasyon ang Columbian Dyip ug Rain or Shine Elasto Painters ug  kun mapilde gihapon magpasabot nga wala na sila'y purohan  nga moabante pa sa playoffs sa PBA Governors Cup.

Ang wala pa'y daog nga Columbian makigsangka sa Magnolia Hotshots sa alas-4:30 sa hapon, samtang ang nagkagidlay nga Rain or Shine moharong sa Alaska Aces sa main game sa alas-6:45 sa gabii didto sa Smart Araneta Coliseum.

Ang Dyip nahimutang sa ilawom nga bahin sa standing sa ilang 0-6 nga baraha ug kinahanglan nila nga modaog  batok sa No. 2   nga Magnolia (4-1) aron magpabiling buhi ilang tsansa sa quarterfinals.

Hinuon, si Columbian coach Johnedel Cardel miangkon nga tungason ilang duwa batok sa Magnolia, apan desidido sila nga mobangon human sila gilubong sa San Miguel Beermen, 119-143 sa miagi nilang duwa.

Sa ilang bahin, si coach Caloy Garcia mamasin nga makaiskor sa labing una nilang daog sa upat ka duwa, apan kinahanglan nga doblehon sa iyang mga batos ang paningkamot tungod kay dili basta-basta ang Alaska.

Ang Painters mosandig sa import nilang si J'Nathan Bullock uban sa mga lokal nga sila si Beau Belga, Gabe Norwood ug Raymond Almazan.