Baby Lancers miihaw sa Wildkittens
CEBU, Philippines — Si All-Star forward Joshua Yerro mibugha og 29 puntos uban ang 22 ka rebounds sa dihang gimasaker sa University of the Visayas (UV) Baby Lancers ang Cebu Institute of Technology-University (CIT-U) Wildkittens, 118-67, aron pagpabiling way pilde sa 18th Cebu Schools Athletic Foundation, Inc.(CESAFI) men's basketball tournament kagahapon diha sa Cebu Coliseum.
Si Yerro, nga milabay sab og unom ka assists, gipaluyohan ni Gabriel Cometa nga mibahug og 24 puntos ug Mar Leandro Actub, nga dunay 16 puntos ug 11 ka rebounds sa dihang ang Baby Lancers miinat sa mainit nilang ratsada ngadto sa 6-0.
Ang Baby Lancers nanginahanglan na lang karon og tulo ka daog aron hingpit nang makaangkon og awtomatik nga luna sa finals.
Human sa sikit nga sinugdanan, 28-23, ang Baby Lancers misugod og buak sa duwa sa ikaduhang kuwarter diin sila milusad og 29-17 run aron pagkadlit og 57-40 nga bintaha sa halftime.
Misamot pa og kainit ang Baby Lancers sa second half diin ilang gihimo ang 80-53 nilang labaw human sa tulo ka kuwarter ngadto sa 51 puntos nga demolisyon.
Si reigning CESAFI Juniors MVP Beirn Anthony Laurente mitali og 19 puntos apil ang lima ka tres alang sa Baby Lancers nga mao na lang karon ang bugtong koponan nga way pilde sa liga.
Samtang ang Wildkittens misukarap ngadto sa ikalima nilang pilde sa pito ka duwa. (BANAT NEWS)
- Latest
