David Justin nakasagunson daog sa Alegado Cup

CEBU, Philippines — Ang David Justin milansang sa ilang ikaduhang sunod-sunod nga daog human nakaipsot sa L&T, 69-67 sa open division sa 8th Mayor Teresa 'Nene' P. Alegado Fiesta Basketball League didto sa Consolacion.

Sila si Jonil Maglasang ug Erwin Brigoli mitali og 13 puntos matag usa, samtang si Arnel Momo miamot og 10 puntos alang sa David Justin nga nakigsawo karon sa ikaduhang dapit sa standing uban ang Boss KTV sa managsamang 2-1 nga baraha.

Si Emmanuel Villamor mitagak og 25 puntos, samtang sila si Benson Colango ug Rey Gonzaga nagkumbinar og 25 puntos, apan walay nahimo nga kaayohan gumikan kay ang L&T nasugamak ngadto sa ikatulo niining sunod-sunod nga pilde.

Sa laing duwa, ang managsuong Larry ug Lemuel Malagar nagkumboya'g 50 puntos sa dihang ang Branz All Friends mipaksit sa  Doms Autoparts, 89-82  alang sa una nilang daog sud sa duha ka duwa. Ang mga Malagar gipaluyohan ni Jan Janiel Abinales nga miamot og 12 puntos.

Sila si Warren Cañete, Franco Te ug Philip Niño Garcia pulos mikadlit og 14 puntos alang sa Doms Autoparts nga nadakin-as ngadto sa 1-2.

Sa laing bahin, si Emmanuel Villamor mibahog og 31 puntos, si Glenn Maghinay dunay 18 ug Mils Anthony Linao mitali og 11 sa dihang gipakaging sa Danlag ang Poblacion Occidental, 84-76 aron pagpabiling buhi sa Inter-Barangay Seniors Category A, samtang si Aljun Molo mihipos og 17 puntos sa dihang ang Panas nakaeskapo batok sa Sacsac, 49-47  sa Inter-Barangay Seniors Category B.

Sa SK Juniors Category A, si Ruel Villarino mipupo og 19 puntos ug sila si Michael Alinsug ug Antonio Trangia nakatigum og 29 puntos sa dihang gipilde sa Tayud ang Poblacion Occidental, 71-68, samtang sila si Marco Booker Panta, Albert Tero, Jassaint Maglasang ug John Lloyd Pepito nagkumboya og 56 puntos sa dihang gilubong sa Pitogo ang Jugan, 99-66.

Sa laing aksiyon, si Joniel Molo mihipos og 16 puntos sa dihang gipabakwit sa Panas ang Panoypoy, 51-33, samtang sila si John Paul Talisic, Joelito Cantago ug Joffitz French Ruelo nagkumbinar og 35 puntos sa dihang gipalayas sa Tilhaong ang Polog, 55-53 sa SK Juniors Category B.

Sa Midgets Category A, sila si Lance de la Cerna ug Clark Jugan mitimbre og 37 puntos sa Danlag nga mipilde sa Cabangahan, 69-63, samtang ang Polog ug Sacsac pabiling nagginhawa sa Midgets Category B human gipukan ang Panas, 50-46 ug Tilhaong, 62-42. (BANAT NEWS)