CEBU, Philippines — Si Saul 'Canelo' Alvarez naglantaw ngadto sa ikatulong away uban ni Gennady Golovkin human iyang giputol ang kanhi walay pilde niining paghari isip middleweight champion.
Ang Mehikanong bitoon nga si Alvarez mipakita og igong kadasig ug determinasyon sa pagkulit niini og majority decision nga kadaogan batok ni Golovkin sa dumot ug eksplosibo nilang rematch niadtong Domingo didto sa T-Mobile Arena sa Las Vegas, Nevada.
Sa dihang gisukna kun andam ba siyang makigharong og balik ni Golovkin, positibo ang nahimong tubag ni Alvarez.
"If the people want another round, I'll do it again," matud pa ni Alvarez nga nagtangag na karon og 50 -1-2 record. Kabahin sa iyang kadaogan, si Alvarez nagkanayon nga masaligon kaayo nga iya kining makab-ot gumikan kay nasayod na man siya kun unsay patyanan ni Golovkin.
Ang duha ka judges parehong miiskor og 115-113 alang ni Alvarez, samtang ang ikatulo mitabla sa away, 114-114.
Sa iyang bahin, si Golovkin interesado sab kaayo nga makigbinukbukay ni Alvarez sa ikatulong higayon ilabi na kun mao kini ang gihandum sa kadaghanan. (BANAT NEWS)