Rey suwerte gyud sa UV

CEBU, Philippines – Si Rey Anthony Suerte mitagak og 13 sa iyang 29 puntos sa katapusang kuwarter aron aswaton ang two-time defending champion University of the Visayas (UV) Green Lancers ngadto sa makutas nga 73-69 nga kadaogan batok sa University of San Carlos (USC) Warriors,  alang sa labing una nilang duha ka sagunson nga daog sa 18th Cebu Schools Athletic Foundation, Inc. (CESAFI) men's basketball tournament kagabii diha sa Cebu Coliseum.

Sa dihang nakalabaw og balik ang Warriors, 57-55, human mapapas ang 13 puntos nilang labaw, 29-16, sa sayong bahin sa ikaduhang kuwarter, si Suerte miratsada og sayes puntos aron pagpaabante sa Lancers, 61-59, sa nahibilin nga 6:51 sa kulbahinam nga duwa.

Ang Warriors mitubag pinaagi sa 7-0 run aron pagposte og  66-61 nga labaw apan si Suerte mikadlit og singko puntos sa 7-2 rally nga nakapatabla sa iskor, 68-68, sa pinal nga 1:43 sa duwa.

Abante ang USC sa katapusang higayon sa iskor nga 69-68 gumikan kay giwani ni Gileant Delator si Froilan Mangubat aron pagpasud sa iyang running jumper nga nakapalabaw sa UV, 70-69, sa nahibiling 1:21 sa duwa.

Human si Roosevelt Jelianggao nasipyat sa krusyal niyang layup, dali nga gi-foul sa USC si Suerte, nga kalmado kaayong milansang sa duha niya ka free throws aron pagsilyo sa iyang pagkamabayanihon sa Lancers, 72-69, sa katapusang 54 segundos.

Ang 6'6" Liberian import nga si Bassieru Sackor miamot og 16 puntos ug si Jancork Cabahug mitali og 11 alang sa Lancers nga nagbitbit na karon og 2-2 nga baraha.

Ang Warriors, nga gipangulohan ni Sonti Managor uban ang 16 puntos, nadakin-as ngadto sa 2-3.