Wildkittens mitukob sa baby Cobras

CEBU, Philippines — Nagmangtas gilayon ang Cebu Institute of Technology-University (CIT-U) Wildkittens hinungdan nga ilang gitukob  ang  Southwestern University (SWU)-Phinma Baby Cobras, 74-61  pagsugod sa 18th Cebu Schools Athletic Foundation, Inc. (CESAFI) basketball season kagahapon diha sa Cebu Coliseum.

Dominado kaayo sa Wildkittens ang duwa gikan sa pagsugod ug dali silang nakabawi  dihang diriyot kini mikolapso sa ikatulong kuwarter dayon na ngadto sa paglubong sa Baby Cobras og 13 puntos aron ablihan ang ilang kampanya pinaagi sa usa ka masipang buto.

Si Vincent Bugati mitali og 13 puntos, si  Sol Jade Tirol midugang og 12, samtang si Carlos Garcia miiskor og 10 alang sa Wildkittens nga miposte og 15 puntos nga labaw sa halftime, 42-27.

Namugnaw kadiyot ang Wildkittens hinungdan nga nakasikit ang Baby Cobras ngadto na lang sa singko puntos, 49-54.

Apan mao na diay kadto ang labing nindot nga mahimo sa Baby Cobras gumikan kay ang Wildkittens misira sa ikatulong kuwarter pinaagi sa 7-2 run aron pag-angkon og  61-51 nga bentaha.

Misamot pa ang kainit sa Wildkittens hinungdan nga ilang gipaburot og balik ang ilang labaw ngadto sa 15 puntos, 69-54 sa katapusang sayes minutos sa aksiyon. Wala na makaugpo pa sukad niadto ang Baby Cobras.

Si Jack Nazario maoy nangu sa Baby Cobras uban ang 15 puntos, samtang si Brian Santillan mihipos og 13 puntos sa pilderong kawsa.