Labing dako nga ironman moasdang sa sugbo

CEBU, Philippines – Miabot ngadto sa 38 ka dekalibreng  triathletes gikan sa nagkalainlaing dapit sa  kalibotan ang magtakus sa ilang abilidad sa gipangagpas nga maoy labing dako ug labing bug-at nga Ironman event sa nasud, ang Aguila Regent Ironman 70.3 Philippines Asia Pacific Championships nga gikatakda karong Agosto 5 diha sa Shangri-La Mactan Resort and Spa sa Dakbayan sa Lapu-Lapu.

Si Tim Reed, ang labing tadhan nga triathlete sa Australia ug maoy  nihawod sa men's division sa miaging tulo ka tuig, magsagubang og  lisud nga hagit sa iyang misyon pagsakmit sa upat ka sagunson nga korona.

Kini gumikan kay daghan man ang mga lig-ong entrante ang mosuway pagpalayas kaniya sa iyang trono, apil na niini sila si Mauricio Mendez, ang Mehikanong kanhi kampiyon sa XTERRA ug maoy midaog sa labing unang Ironman 70.3 Davao niadtong Marso, si 12-time Ironman New Zealand champion Cameron Brown ug 3-time world champion Craig Alexander.

"Everybody is excited for this particular Ironman race for its star-studded cast in the centerpiece pro division and a championship course ready to challenge even the best in the fold," matud pa ni Wilfred Uytengsu, ang CEO sa Sunrise Events  Inc. nga maoy nagpadagan sa maong  kutas nga lumba nga naglangkob og 1.9km swim, 90km bike ug 21.2km run.

Lain pang gustong mobabag sa dalan ni Reed ngadto sa kalampusan mao sila si Sam Betten, Kevin Collington, Brad Williams, Matt Burton, Luke McKenzie, Braden Currie, Matthew Chrabot, Josh Amberger, Nathan Groch, Brent McMahon, Mike Phillips, Casey Munro, Michael Raelert, Jakub Langhammer, David Mainwaring ug Tyler Butterfield.

Sa women's division, susama sab kahugot ang kompetisyon ubos sa pagpangu ni Czech Radka Kahlefeldt  nga mosuway og langkat sa ikatulo niyang titulo human gidominar ang Ironman 70.3 Subic sa miaging tuig ug ang labing unang Ironman 70.3 Davao niadtong Marso.

Ang mga bug-at nga pangan nga ikabangga ni Kahlefeldt naglakip sa beteranang si Dimity Lee Duke, 4-time Philippine champion Caroline Steffen ug kanhi Ironman Australia champion Beth McKenzie.

Angay sab silang magmatngon nilang Anna Eberhardt, Lauren Goss, Beth McKenzie, Bruna Mahn, Sabrina Stadelmann, Saleta Noquiera, Lisa Tyack, Lauren Brandon, Grace Thek, Mel Hauschildt, Simone Maier, Holly Khan, Manami Iijima, Maja Stage Nielsen ug Angela Naeth nga pulos sab nangambisyon nga makampiyon.