Accenture mipayaka sa Convergys sa E-Leagues

CEBU, Philippines — Si Sherwin Resilla mitagak og 35 puntos uban ang 11 ka rebounds, tulo ka assists ug tulo ka steals aron aswaton ang Accenture Sharks ngadto sa 67-62 nga kadaogan batok sa grandslam champion Convergys Converters sa 14th CSCC E-Leagues men's basketball tournament diha sa City Sports Club-Cebu gym.

Ang Sharks miduwa lamang uban ang unom ka players nga tipik sa ilang silot gumikan sa kalapasan nga ilang nahimo atol sa seremonyas sa pagbukas.

Si Ryan Veloso midugang og 12 puntos, 13 ka rebounds, tulo ka assists ug duha ka steals alang sa Sharks nga migamit og 19-7 run sa ikaduhang kuwarter aron hingpit niining pagkontrolar sa duwa uban ang 33-25 nga labaw sa halftime.

Nangu sa pilderong Convergys mao si Lourenz Limpangog bitbit ang 21 puntos ug gisundan  kini ni Admir Batiancila nga dunay 15 puntos, pito ka rebounds upat ka assists ug duha ka steals.

Sa laing duwa sa Elite Classic, si Earldred Montilla mipabuhagay og 26 puntos, lima ka steals, upat ka assists ug upat ka rebounds, samtang si Jhoneil Geraldizo ug Jan Michael Auditor mikadlit og 17 puntos matag usa sa dihang gilabhan sa Sykes Pioneers ang ePerformax Reds, 86-73.

Nagparamdam sab si Sherwin Anghay nga dunay 14 puntos, upat ka steals, tulo ka rebounds ug tulo ka assists alang sa Pioneers, nga milusad og nagbagang 41-23 nga rally sa tunga-tungang mga kuwarter aron pagmakmak sa Reds.

Sa Evo League, sila si Robert Rebano ug Steven-Globe Cabanday nagkumboya og 52 puntos, 10 ka rebounds, siyam ka steals ug walo ka assists aron pangulohan ang Tech Mahindra Tech Mighties batok sa Cognizant Tech Solutions Gladiators, 90-82, samtang si Ralph Belarmino mikadlit og 19 puntos, 13 ka rebounds ug tulo ka steals ug si Jan Isiah Gabest miamot og 14 puntos sa dihang gilampornas sa Dreamscape Networks ang Bombardier Grey Wolves, 64-36. (BANAT NEWS)