Parker balhin sa Hornets

CEBU, Philippines —  Nahuman na ang salida ni Tony Parker uban sa San Antonio Spurs sulod sa 17 ka tuig diin siya nakadaog og upat ka kampiyonato sa NBA.

Kini human ang six-time All-Star point guard miuyon ngadto sa duha ka tuig nga kontrata uban sa Charlotte Hornets nga balor og $10 million.

Ang maong lakang ni Parker naghiusa kaniya uban ni kanhi Spurs assistant James Borrego  nga mao na karon ang head coach sa Hornets.

Si Parker kabahin sa 137 ka daog sa playoffs uban ni Spurs coach Gregg Popovich nga maoy ikaduhang labing daghan sa usa ka coach ug player sa kasaysayan sa NBA.

Mao kini ang hinungdan nganong si Popovich maoy labing magul-anon sa pagbiya ni Parker nga kabahin sa gikaintapang Big 3 sa Spurs uban nilang Manu Ginobili ug Tim Duncan nga retirado na.

"All of us in the Spurs organization will miss having Tony in our program and wish him and his family the best as he continues his remarkable career in Charlotte," matud pa ni Popovich.

Sa laing bahin, si Carmelo Anthony ug ang Oklahoma City Thunder nagkasinabot nga dili na siya magpabilin sa team sunod season.

Wala pa hinuo'y klaro kon unsa ang paagi sa pagbiya ni Anthony sa OKC.

Si Anthony gikatakda nga modawat og $28M karon nga season nga maoy katapusan sa lima ka tuig niyang kontrata nga iyang gipirmahan sa New York Knicks nga mibalor og $125M sa wala pa siya mobalhin sa OKC.