BAYUGAN CITY, Agusan del Sur, Philippines –Ang Phoenix Fuels Life- University of Cebu (UC) Webmasters nagmangtas sa second half aron panitan ang Mair Construction-Southwestern University (SWU)-Phinma Cobras, 70-55, ingon man angkunon ang katapusang luna sa semis sa Mayor Kim Lope A. Asis Collegiate Invitational Basketball Tournament dinhi sa Lope Asis Memorial Gymnasium kagahapon.
Human mapukan, 71-78 sa mga kamot sa Vincare Pharma-University of Sto. Tomas (UST) Growling Tigers niadtong Martes, ang Webmasters dali nga nakabangon aron moabante sa semis diin ang Bracket A topseed National University (NU) Bulldogs nagpaabot kanila.
Sa lain pang tagakay nga duwa sa Final 4, ang Bracket B No. 1 qualifier nga UST Tigers makigtige sa SG ARQ Builders-Lyceum Polytechnic University (LPU) Pirates.
Ang Tigers ug Bulldogs parehong mitapos sa eliminasyon bitbit ang 2-0 records, samtang ang Webmasters ug Pirates dunay 1-1 nga baraha.
Sa krusyal nga sangka tali sa mga koponan gikan sa Sugbo, sikit kaayo ang kumbati, apan katapusan nakasikit ang Cobras sa iskor nga 42-44 gumikan kay sila si Paul Galinato, Joven Tagudin ug Justine Dacalos milusad og 10-0 run nga nakapalabaw og 12 puntos sa Webmasters, 54-42 human sa tulo ka kuwarter.
Samtang pabilin nga nanginit ang mga kamot ni Galinato, ang 6-foot-8 Cameroonian import nga si Frederick Elombi miapil sab og salida hinungdan nga gitiwasan sa UC ang SWU, 70-52, sa nahibilin nga 1:26 sa duwa.
Si John Calvin Jabello hinuon maoy nangu uban ang 17 puntos, 12 niini iyang gitagak sa ikaduhang kuwarter, samtang sila si Galinato ug Elombi mitali og 15 puntos matag usa.
Sila si Shaquille Imperial ug Edmundo Bayhonan nagkumboya og 23 puntos alang sa Cobras nga mangindahay na lang karon alang sa ikalimang puwesto batok sa Greene Builders/Xavier University-Ateneo de Cagayan Crusaders.