Baby Lancers miihaw sa Dragons

CEBU, Philippines — Walay kukaluoy nga giihaw sa University of the Visayas (UV) Baby Lancers ang Cebu Eastern College (CEC) Dragons, 91-62  alang sa  ikatulo nilang sunod-sunod nga daog sa 2018 Cebu Schools Athletic Foundation, Inc. (CESAFI) Partner's Cup kagahapon diha sa Cebu Coliseum.

Si Joshua Yerro miduslak og 19 puntos ug si Gabriel Cometa mihabis og 18 puntos alang sa Baby Lancers nga nakasustinir sa  init nilang pagbangon human nasugamak sa una nilang duwa  batok sa Organique California-University of Southern Philippines Foundation (USPF) Baby Panthers.

Human   sa   bugnaw nga         sinugdanan,  ang Baby Lancers mipatuasik og mainit nga 27-11 rally sa ikaduhang kuwarter aron pagposte og 44-27 nga bentaha sa halftime.

Misamot pa og kabagsik ang Baby Lancers sa nahibiling bahin sa duwa aron pag-inat sa ilang labaw ngadto na sa 30 puntos, 81-51 sa katapusang singko minutos sa aksiyon.

Si John Banzon midugang og 16 puntos sa Baby Lancers nga nahimutang karon sa ikatulong dapit sa liderato sa juniors division bitbit ang 3-1 nga baraha sunod sa 3-0 Baby Panthers ug 2-0 Hotel Fortuna-University of Cebu (UC) Junior Webmasters. Ang Dragons natagak ngadto sa 1-3.

Sa sayo pa, sila si Kenrick Abarquez ug Niño Paras mihipos og 16 puntos matag usa alang sa Casino Active/University of San Jose-Recoletos (USJ-R) Baby Jaguars nga migamit og nagkayong ataki sa nanghinapos nga bahin sa duwa aron tumbahon ang Cebu Institute of Technology-University (CIT-U) Wildkittens, 89-81.

Ang Baby Jaguars nagtangag na karon og 2-2 nga baraha, samtang ang Wildkittens nakatilaw sa ikatulo nilang sunod-sunod nga pilde.