CEBU, Philippines – Dako ang pagtuo ni Australian boxer George Kambosos Jr. nga makatilaw gyud og kulata ang Argentinian nga si Lucas Matthysse gikan ni Manny Pacquiao sa ilang sangka karong Hulyo 15 didto sa Malaysia.
Si Kambosos Jr. mao karon ang sparmate ni Pacquiao nga padayon sa iyang subsob nga ensayo didto sa iyang gym sa General Santos pangandam sa sangka batok Matthysse alang sa WBA welterweight title.
Si Kambosos Jr. nga nahimo nga main sparmate ni Pacquiao miingon nga hapit na 40-anyos si Pacquiao, apan dili katuohan ang kapaspas ug kusog niini.
Miingon siya nga si Matthysse usa ka boksidor nga huyang og depensa ug maglisud kini pagsagang sa mga kinumo ni Pacquiao.
Midugang si Kambosos Jr. nga kun masakto sa kulata, posible pa nga mapaundang ni Pacquiao si Matthysse sa tunga-tungang bahin sa away.