CEBU, Philippines – Ang Organique-University of Southern Philippines Foundation (USPF) Baby Panthers milusad og nagbagang opensiba sa second half aron paglampaso sa Cebu Eastern College (CEC) Dragons, 84-60 ug pagpabiling wa'y pilde sa 2018 Cebu Schools Athletic Foundation, Inc. (CESAFI) Partner's Cup kagabii diha sa Cebu Coliseum.
Si Elijan Singson, anak ni kanhi PBA star Dale Singson, milansang og upat ka tres aron paghatag sa Baby Panthers og 24-17 nga labaw nga ila pang giinat ngadto sa 44-35 sa halftime.
Ang Dragons maoy unang nakaiskor sa final half, apan ang Baby Panthers mitubag pinaagi sa pagpabuto og 23-8 nga bomba aron pag-abante og 22 puntos human sa tulo ka kuwarter, 67-45.
Ang Baby Panthers miangkla dayon sa Dragons ngadto lamang sa singko puntos sa nag-unang siyete minutos sa katapusang kuwarter samtang sila mikadlit og 15 aron pagposte sa kinadak-an nilang labaw nga 32 puntos, 82-50 sa nahibilin nga tres minutos sa duwa.
Sila si Singson ug Neon Chavez mitali og 14 puntos matag usa, si Kyle Ochavo midugang og 11 puntos, samtang si Cris Isabelo dunay 10 puntos alang sa Baby Panthers nga temporaryo karong nag-una sa liderato bitbit ang 2-0 record.